Ngai Wa Uthingu Wa Ibrahimu Ithe Witu Lyrics

Ngai wa ũthingu wa Ibrahimu Ithe witũ;
Tondũ ya thakame ya mũrũguo thikĩrĩria.
Mũthĩnjĩri ũrĩ tha atũitĩrĩirie,
Ũtugi wa thakame na maĩ.

Nĩwe mwĩhoko wa ngoro yakwa ndũgakire,
Mehia na waganu na mahĩtia thambia there.
Ũnjĩtĩke ũrĩ kĩgongona-inĩ,
Kĩa matu-inĩ kĩiyũrĩte ũthingu.

Baba nĩ wairire ngoro mĩaka mĩrongo ĩna,
Nĩ andũ arĩa warutire Misri ũkĩmanina.
Tiga marakara riganĩrwo,
Nĩ mehia maitũ ndũgatũnine.

Ririkana Joshua ngombo yaku we Jehova,
Nĩ agiririe Baba rĩtwa rĩaku itheru rĩconorwo.
Maguta marĩa wamũitĩrĩirie,
Ndamaconirithirie ndũrĩrĩ.

Ithandũkũ rĩa mwĩhĩtwa waku rĩrĩa itheru,
Jorondani yarĩonire ĩkĩũra nĩũndũ warĩo.
Rĩgĩthiũrũrũkĩria Jeriko,
Matukũ mũgwanja rĩkiunanga.

Ũhoti waku Jehova Ngai wainainirie,
Ngoro cia Athamaki arĩa matũire Kaanani othe.
Tondũ mehokete mĩhianano,
Nawe ndũtariĩ ta ũguo Ithe witũ.

Ikũrũkĩra ngoro cia Athuri na Atumia,
Na Anake na Airĩtu na ciana cia ngenge.
Wĩna irathimo mĩthemba yothe,
Ya kĩrĩkanĩro gĩaku kĩerũ.

Tha ciaku mũthĩnjĩri mũnene na mũtugi,
Iria weranĩire na maroho ma Anabii.
Atĩ nĩ ũkagarũra meciria,
Ma ngoro ciothe matuĩke meerũ.